uTho ab der hoti hai wahan chal kar sanwar jaana

uTho ab der hotī hai vahāñ chal kar sañvar jaanā

yaqīnī hai ghaḌī do meñ marīz-e-ġham kā mar jaanā

mujhe Dar hai guloñ ke bojh se marqad na dab jaa.e

unheñ aadat hai jab aanā zarūr ehsān dhar jaanā

habāb aa sāmne sab valvale josh-e-javānī ke

ġhazab thā qulzum-e-ummīd kā chaḌh kar utar jaanā

yahāñ juz kashtī-e-mauj-e-balā kuchh bhī na pāoge

isī ke āsare dariyā-e-hastī se utar jaanā

mabādā phir asīr-e-dām-e-aql-o-hosh ho jā.ūñ

junūñ kā is tarah achchhā nahīñ had se guzar jaanā

'hafīz' āġhāz se anjām tak rahzan ne pahuñchāyā

usī ko ham-safar paayā usī ko ham-safar jaanā

uTho ab der hoti hai wahan chal kar sanwar jaana

yaqini hai ghaDi do mein mariz-e-gham ka mar jaana

mujhe Dar hai gulon ke bojh se marqad na dab jae

unhen aadat hai jab aana zarur ehsan dhar jaana

habab aa samne sab walwale josh-e-jawani ke

ghazab tha qulzum-e-ummid ka chaDh kar utar jaana

yahan juz kashti-e-mauj-e-bala kuchh bhi na paoge

isi ke aasare dariya-e-hasti se utar jaana

mabaada phir asir-e-dam-e-aql-o-hosh ho jaun

junun ka is tarah achchha nahin had se guzar jaana

'hafiz' aaghaz se anjam tak rahzan ne pahunchaya

usi ko ham-safar paya usi ko ham-safar jaana