اترا ہے آسماں سے فرشتہ زمین پر

اترا ہے آسماں سے فرشتہ زمین پر

بکھرا ہے اس کے نور کا جلوہ زمین پر

کھاتے پھریں گے آپ بھی دھوکہ زمین پر

دیکھیں نہ آسمان کا سپنا زمین پر

ملتا جو سب کو ایک سا موقعہ زمین پر

سوتا نہ کوئی آدمی بھوکا زمین پر

دیکھو جہاں وہیں پہ ہے میلہ زمین پر

پھر بھی ہر ایک شخص ہے تنہا زمین پر

کرنا ہی ہوگا اتنا بسر ہر کسی کو یاں

جتنا بھی وقت رب نے ہے لکھا زمین پر

آباد ہر طرح سے رہیں ہے دعا یہی

جن سے جڑا ہے پیار کا رشتہ زمین پر

اب تو رہائی دے دے غم زندگی کہ میں

اکتا چکا ہوں بن کے تماشہ زمین پر

مہمان چند روز کے سب لوگ ہیں یہاں

قائم نہیں ہے کوئی بھی بندہ زمین پر