utra hai aasman se farishta zamin par

utrā hai āsmāñ se farishta zamīn par

bikhrā hai us ke nuur kā jalva zamīn par

khāte phireñge aap bhī dhoka zamīn par

dekheñ na āsmān kā sapnā zamīn par

miltā jo sab ko ek sā mauqa zamīn par

sotā na koī aadmī bhūkā zamīn par

dekho jahāñ vahīñ pe hai mela zamīn par

phir bhī har ek shaḳhs hai tanhā zamīn par

karnā hī hogā utnā basar har kisī ko yaañ

jitnā bhī vaqt rab ne hai likkhā zamīn par

ābād har tarah se raheñ hai du'ā yahī

jin se juḌā hai pyaar kā rishta zamīn par

ab to rihā.ī de de ġham-e-zindagī ki maiñ

uktā chukā huuñ ban ke tamāsha zamīn par

mehmān chand roz ke sab log haiñ yahāñ

qaa.em nahīñ hai koī bhī banda zamīn par

utra hai aasman se farishta zamin par

bikhra hai us ke nur ka jalwa zamin par

khate phirenge aap bhi dhoka zamin par

dekhen na aasman ka sapna zamin par

milta jo sab ko ek sa mauqa zamin par

sota na koi aadmi bhuka zamin par

dekho jahan wahin pe hai mela zamin par

phir bhi har ek shaKHs hai tanha zamin par

karna hi hoga utna basar har kisi ko yan

jitna bhi waqt rab ne hai likkha zamin par

aabaad har tarah se rahen hai du'a yahi

jin se juDa hai pyar ka rishta zamin par

ab to rihai de de gham-e-zindagi ki main

ukta chuka hun ban ke tamasha zamin par

mehman chand roz ke sab log hain yahan

qaem nahin hai koi bhi banda zamin par