utra samundaron mein kabhi chand par gaya

utrā samundaroñ meñ kabhī chāñd par gayā

le kar kahāñ kahāñ mujhe zauq-e-safar gayā

āñkheñ khulīñ to ḳhvāb-e-tamannā se Dar gayā

ḳhush-fahmiyoñ kā ā.ina-ḳhāna bikhar gayā

derīna hasratoñ ke shagūfe mahak uThe

jhoñkā havā kā band-e-qabā chaak kar gayā

lahje kī talḳhiyoñ meñ samoyā huā ḳhulūs

e'jāz-e-harf thā ki diloñ meñ utar gayā

fasl-e-bahār tak thiiñ qabā.eñ guloñ kī chaak

phir vahshatoñ kā chaḌh ke vo dariyā utar gayā

chāhā thā ahl-e-naqd-o-nazar ne to aur kuchh

chehra kuchh aur fan kā hamāre nikhar gayā

aaya thā anjuman meñ liye qahqahe 'azīz'

uTh kar gayā to bazm ko afsurda kar gayā

utra samundaron mein kabhi chand par gaya

le kar kahan kahan mujhe zauq-e-safar gaya

aankhen khulin to KHwab-e-tamanna se Dar gaya

KHush-fahmiyon ka aaina-KHana bikhar gaya

derina hasraton ke shagufe mahak uThe

jhonka hawa ka band-e-qaba chaak kar gaya

lahje ki talKHiyon mein samoya hua KHulus

e'jaz-e-harf tha ki dilon mein utar gaya

fasl-e-bahaar tak thin qabaen gulon ki chaak

phir wahshaton ka chaDh ke wo dariya utar gaya

chaha tha ahl-e-naqd-o-nazar ne to aur kuchh

chehra kuchh aur fan ka hamare nikhar gaya

aaya tha anjuman mein liye qahqahe 'aziz'

uTh kar gaya to bazm ko afsurda kar gaya