uTThe ghubar-e-shor-e-nafas to wahshat mat karna

uTThe ġhubār-e-shor-e-nafas to vahshat mat karnā

dasht-darūñ se hijrat kaisī hijrat mat karnā

dariyā sabza phuul sitāre achchhī ḳhvāhish hai

patthar kāñTe dhuup gard se nafrat mat karnā

ik sach kī āvāz meñ haiñ jiine ke hazār āhañg

lashkar kī kasrat pe na jaanā bai.at mat karnā

neza-e-subh pe le kar chalnā kal kā sūraj

shab meñ magar ailān-e-naved-e-nusrat mat karnā

maiñ to sab kuchh dekh rahā huuñ kyā kyā hai us paar

maiñ jo kahūñ shīshe kā falak hai hairat mat karnā

geñd sī hai be-vazn ye duniyā merī Thokar meñ

maiñ jo kahūñ tum is ko uchchhālo jur.at mat karnā

'ramz' samundar kī gahrā.ī merā sar-e-añgusht

maiñ jo kahūñ utro paanī meñ ujlat mat karnā

uTThe ghubar-e-shor-e-nafas to wahshat mat karna

dasht-darun se hijrat kaisi hijrat mat karna

dariya sabza phul sitare achchhi KHwahish hai

patthar kanTe dhup gard se nafrat mat karna

ek sach ki aawaz mein hain jine ke hazar aahang

lashkar ki kasrat pe na jaana baiat mat karna

neza-e-subh pe le kar chalna kal ka suraj

shab mein magar ailan-e-nawed-e-nusrat mat karna

main to sab kuchh dekh raha hun kya kya hai us par

main jo kahun shishe ka falak hai hairat mat karna

gend si hai be-wazn ye duniya meri Thokar mein

main jo kahun tum is ko uchchhaalo jurat mat karna

'ramz' samundar ki gahrai mera sar-e-angusht

main jo kahun utro pani mein ujlat mat karna