اٹھے تو تھے ارباب ستم سوچ سمجھ کے

اٹھے تو تھے ارباب ستم سوچ سمجھ کے

سب مل گئے مٹی میں بھرم سوچ سمجھ کے

ہر چند ہے کانٹوں سے بھری راہ ہماری

ہم نے بھی اٹھائے ہیں قدم سوچ سمجھ کے

یہ شے دل خوددار کی ٹھکرائی ہوئی ہے

اس سمت اٹھے چشم کرم سوچ سمجھ کے

اب لرزہ بر اندام ہے کیوں وحشت قاتل

کرنا تھا مرے سر کو قلم سوچ سمجھ کے

مٹتا ہے کہیں نقش رفاقت دل ناداں

کھا ترک تعلق کی قسم سوچ سمجھ کے

اس عہد ریاکار سے اللہ بچائے

اب خود سے بھی ملتے ہیں تو ہم سوچ سمجھ کے

اٹھتا ہے اگر درد نکل پڑتی ہیں چیخیں

کرتے نہیں اظہار الم سوچ سمجھ کے

ہر چند کہ دیوانہ سا لگتا ہے عزیزؔ اک

کرتا ہے مگر شعر رقم سوچ سمجھ کے