uTThi hai jab se dil mein mere ishq ki tarang

uTThī hai jab se dil meñ mire ishq kī tarañg

shādī o ġham haiñ aage mire donoñ ek rañg

jab se huā huuñ bāda-e-tauhīd se maiñ mast

uThtī hai dil se naġhma-e-mansūr kī umañg

dil andarūn-e-sīna magar ho gayā hai ḳhuun

nikle haiñ merī ā.ankhoñ se jo ashk surḳh rañg

pahuñche hai tīr-e-āh mirā arsh ke pare

jab se lagā hai dil meñ mire ishq kā ḳhadañg

nairañgiyāñ tirī haiñ huī jaise jalva-gar

hosh-o-havās-o-aql-e-rasā jumla haiñ ye dañg

ik baar gar vo dekhe tire ruḳh ko be-naqāb

ka.aba-parast hove vahīñ par but-e-farañg

kar nām-o-nañg tark dilā rāh-e-ishq meñ

āshiq vahī hai jis ko ki hai is se ār-o-nañg

mat rakh tū bahr-e-ishq meñ ai bul-havas qadam

har qatre meñ yahāñ haiñ balā ke do sad nahañg

'āsim' maiñ kyā karūñ shah-e-ḳhādim kī ab sanā

hai pā-e-aql arsa-e-mid.hat meñ us ke lañg

uTThi hai jab se dil mein mere ishq ki tarang

shadi o gham hain aage mere donon ek rang

jab se hua hun baada-e-tauhid se main mast

uThti hai dil se naghma-e-mansur ki umang

dil andarun-e-sina magar ho gaya hai KHun

nikle hain meri aaankhon se jo ashk surKH rang

pahunche hai tir-e-ah mera arsh ke pare

jab se laga hai dil mein mere ishq ka KHadang

nairangiyan teri hain hui jaise jalwa-gar

hosh-o-hawas-o-aql-e-rasa jumla hain ye dang

ek bar gar wo dekhe tere ruKH ko be-naqab

kaba-parast howe wahin par but-e-farang

kar nam-o-nang tark dila rah-e-ishq mein

aashiq wahi hai jis ko ki hai is se aar-o-nang

mat rakh tu bahr-e-ishq mein ai bul-hawas qadam

har qatre mein yahan hain bala ke do sad nahang

'asim' main kya karun shah-e-KHadim ki ab sana

hai pa-e-aql arsa-e-midhat mein us ke lang