اونچائیوں سے خاک میں اترے ہوئے بھی دیکھ

اونچائیوں سے خاک میں اترے ہوئے بھی دیکھ

اس زیست کے سفر کے سبھی مرحلے بھی دیکھ

روزن بجھا کے میرے نہ ہونے کی دے دلیل

پردے ہٹا کے جھانک مجھے دن چڑھے بھی دیکھ

اس مختصر سی راہ میں رخت سفر نہ باندھ

تجھ سے جو پیشتر ہوئے وہ قافلے بھی دیکھ

سینے کی برف آنکھ کے پانی کا کر شمار

ہونٹوں پہ دب کے مر گئے وہ تذکرے بھی دیکھ

جو یار تیری طرز تغافل میں گم ہوئیں

وہ سسکیاں بھی گن کبھی وہ رت جگے بھی دیکھ

ہنس ہنس کے ترک عشق کی نہ داستاں سنا

اشکوں نے جو لکھے کبھی وہ مرثیے بھی دیکھ