unche makan kha gae sab mere ghar ki dhup

ūñche makān khā ga.e sab mere ghar kī dhuup

hisse meñ mere rah ga.ī bālisht bhar kī dhuup

kartā rahūñ nigāh milā kar maiñ guftugū

har chand chubh rahī ho tire karr-o-far kī dhuup

saaya darīda-pairahanī par ḳhudī kā thā

resham sā lams laa.ī thī go sīm-o-zar kī dhuup

zarḳhezī-e-zamīn-e-suḳhan ke liye mufīd

dil kī havā shu.ūr kā paanī nazar kī dhuup

dil ke gumān sā ki duā ke yaqīn sā

ehsās ke lihāf sā laa.ī kohar kī dhuup

yā to dimāġh-o-dil ke añdheroñ ko duur kar

yā apnī raah le baḌī aa.ī kidhar kī dhuup

rahiye 'naqīb' aisī fazā meñ ki hai jahāñ

sher-o-adab kī chāñdnī ilm-o-hunar kī dhuup

unche makan kha gae sab mere ghar ki dhup

hisse mein mere rah gai baalisht bhar ki dhup

karta rahun nigah mila kar main guftugu

har chand chubh rahi ho tere karr-o-far ki dhup

saya darida-pairahani par KHudi ka tha

resham sa lams lai thi go sim-o-zar ki dhup

zarKHezi-e-zamin-e-suKHan ke liye mufid

dil ki hawa shuur ka pani nazar ki dhup

dil ke guman sa ki dua ke yaqin sa

ehsas ke lihaf sa lai kohar ki dhup

ya to dimagh-o-dil ke andheron ko dur kar

ya apni rah le baDi aai kidhar ki dhup

rahiye 'naqib' aisi faza mein ki hai jahan

sher-o-adab ki chandni ilm-o-hunar ki dhup