upar baadal niche parbat bich mein KHwab ghazalan ka

uupar bādal nīche parbat biich meñ ḳhvāb ġhazālāñ kā

dekho maiñ ne harf jamā ke nagar banāyā jānāñ kā

pāgal panchhī ba.ad meñ chahke pahle maiñ ne dekhā thā

us jampar kī shiknoñ meñ halkā sā rañg bahārāñ kā

bastī yūñhī biich meñ aa.ī asl meñ jañg to mujh se thī

jab tak mere baaġh na Duube zor na TuuTā tūfāñ kā

ham imlāk-parast nahīñ haiñ par yuuñ hai to yūñhī sahī

ik tire dil meñ ghar hai apnā baaqī mulk sulaimāñ kā

rañj kā apnā ek jahāñ hai aur to jis meñ kuchh bhī nahīñ

yā gahrāv samundar kā hai yā phailāv bayābāñ kā

ham koī achchhe chor nahīñ par ek daf.a to ham ne bhī

saarā gahna luuT liyā thā aadhī raat ke mehmāñ kā

upar baadal niche parbat bich mein KHwab ghazalan ka

dekho main ne harf jama ke nagar banaya jaanan ka

pagal panchhi baad mein chahke pahle main ne dekha tha

us jampar ki shiknon mein halka sa rang bahaaran ka

basti yunhi bich mein aai asl mein jang to mujh se thi

jab tak mere bagh na Dube zor na TuTa tufan ka

hum imlak-parast nahin hain par yun hai to yunhi sahi

ek tere dil mein ghar hai apna baqi mulk sulaiman ka

ranj ka apna ek jahan hai aur to jis mein kuchh bhi nahin

ya gahraw samundar ka hai ya phailaw bayaban ka

hum koi achchhe chor nahin par ek dafa to hum ne bhi

sara gahna luT liya tha aadhi raat ke mehman ka