wa-e-nadani ye hasrat thi ki hota dar khula

vā-e-nādānī ye hasrat thī ki hotā dar khulā

ham qafas rāz-e-asīrī kyā kaheñ kyūñkar khulā

fursat-e-ranj-e-asīrī dī na un dhaḌkoñ ne haa.e

ab chhurī sayyād ne lī ab qafas kā dar khulā

allāh allāh ik duā-e-marg ke do do asar

vaañ khulā bāb-e-ijābat yaañ qafas kā dar khulā

uf is āzādi-e-be-hañgām kī majbūriyāñ

maiñ qafas ke paas yuuñ baiThā hī rahtā par khulā

ujlat-e-parvāz jab milne bhī de rāh-e-gurez

yuuñ to khulne ko qafas kā dar khulā aksar khulā

band hai bāb-e-qafas ho sar to paTke jā.iye

ham ne dekhā hai qafas kī tīliyoñ meñ dar khulā

kam to kyā sayyād be-tābī sivā ho jā.egī

tū ne nāhaq tīliyoñ meñ rakh diyā ḳhanjar khulā

āsmāñ garam-e-talāfī chāhiye kaisā qafas

bijliyoñ ke ik ishāre meñ qafas kā dar khulā

likh chuke ham jā chukā ḳhat gar yahī hālat rahī

haath meñ aayā qalam aur shauq kā daftar khulā

dil meñ zaḳhm ashkoñ meñ ḳhuuñ sūrat ba-bīñ-ālam-mapras

vo nigah uf vo mizha nāvak chhupā nashtar khulā

dam-ba-ḳhud sakte kā aalam murdanī chhā.ī huī

rañg merī zindagī kā merī mayyat par khulā

dil meñ terā dhyān ik muddat rahā begāna-vār

khulte hī khulte khulā aur kyā hī sharmā kar khulā

dekhiye kyā gul khilātī hai bahār ab ke baras

ḳhvāb meñ 'fānī' ne dekhā hai qafas kā dar khulā

wa-e-nadani ye hasrat thi ki hota dar khula

hum qafas raaz-e-asiri kya kahen kyunkar khula

fursat-e-ranj-e-asiri di na un dhaDkon ne hae

ab chhuri sayyaad ne li ab qafas ka dar khula

allah allah ek dua-e-marg ke do do asar

wan khula bab-e-ijabat yan qafas ka dar khula

uf is aazadi-e-be-hangam ki majburiyan

main qafas ke pas yun baiTha hi rahta par khula

ujlat-e-parwaz jab milne bhi de rah-e-gurez

yun to khulne ko qafas ka dar khula aksar khula

band hai bab-e-qafas ho sar to paTke jaiye

hum ne dekha hai qafas ki tiliyon mein dar khula

kam to kya sayyaad be-tabi siwa ho jaegi

tu ne nahaq tiliyon mein rakh diya KHanjar khula

aasman garam-e-talafi chahiye kaisa qafas

bijliyon ke ek ishaare mein qafas ka dar khula

likh chuke hum ja chuka KHat gar yahi haalat rahi

hath mein aaya qalam aur shauq ka daftar khula

dil mein zaKHm ashkon mein KHun surat ba-bin-alam-mapras

wo nigah uf wo mizha nawak chhupa nashtar khula

dam-ba-KHud sakte ka aalam murdani chhai hui

rang meri zindagi ka meri mayyat par khula

dil mein tera dhyan ek muddat raha begana-war

khulte hi khulte khula aur kya hi sharma kar khula

dekhiye kya gul khilati hai bahaar ab ke baras

KHwab mein 'fani' ne dekha hai qafas ka dar khula