wabasta-e-dam-e-hosh-o-KHirad hangama-e-wahshat karna hai

vābasta-e-dām-e-hosh-o-ḳhirad hangāma-e-vahshat karnā hai

ta.amīr ke rangīñ phūloñ se taḳhrīb kā dāman bharnā hai

phir azm-e-taqāzā denā hai jazbāt-e-shikasta-fitrat ko

ubhre hue shor-e-tūfāñ kī har mauj ko sāhil karnā hai

vo fitrat-e-zauq-e-azm hī kyā jo ġhair pe takiya kar baiThe

kis kaam kā aisā jiinā hai kis kaam kā aisā marnā hai

tūfān se Takrāne vaale andāza-e-tūfāñ kyā ma.anī

ab quvvat-e-bāzū par tujh ko apne hī bharosa karnā hai

koshish hai ye apnī shām-o-sahar har shāḳh nasheman ho jaa.e

bijlī ke ishāre kahte haiñ tārāj chaman ko karnā hai

vo azm nahīñ vo baat nahīñ vo sub.h nahīñ vo shaam nahīñ

marne ke liye jiite the kabhī jiine ke liye ab marnā hai

vābasta-e-daur-e-ranj-o-alam hai rāh-e-mohabbat kī manzil

'mushtāq' qadam is manzil meñ ab soch samajh kar dharnā hai

wabasta-e-dam-e-hosh-o-KHirad hangama-e-wahshat karna hai

tamir ke rangin phulon se taKHrib ka daman bharna hai

phir azm-e-taqaza dena hai jazbaat-e-shikasta-fitrat ko

ubhre hue shor-e-tufan ki har mauj ko sahil karna hai

wo fitrat-e-zauq-e-azm hi kya jo ghair pe takiya kar baiThe

kis kaam ka aisa jina hai kis kaam ka aisa marna hai

tufan se Takrane wale andaza-e-tufan kya mani

ab quwwat-e-bazu par tujh ko apne hi bharosa karna hai

koshish hai ye apni sham-o-sahar har shaKH nasheman ho jae

bijli ke ishaare kahte hain taraj chaman ko karna hai

wo azm nahin wo baat nahin wo subh nahin wo sham nahin

marne ke liye jite the kabhi jine ke liye ab marna hai

wabasta-e-daur-e-ranj-o-alam hai rah-e-mohabbat ki manzil

'mushtaq' qadam is manzil mein ab soch samajh kar dharna hai