wada-e-sham-e-farda pe ai dil mujhe gar yaqin hi na aae to main kya karun

vāda-e-shām-e-fardā pe ai dil mujhe gar yaqīñ hī na aa.e to maiñ kyā karūñ

un kī jhūTī tasallī ke tūfān meñ nabz-e-dil Duub jaa.e to maiñ kyā karūñ

maiñ ne māñgī thī ye masjidoñ meñ duā maiñ jise chāhtā huuñ vo mujh ko mile

jo mirā farz thā maiñ ne puurā kiyā ab ḳhudā bhuul jaa.e to maiñ kyā karūñ

saare jhagḌe agar mere jiine ke haiñ to galā ghoñT do maiñ bhī be-zār huuñ

maut ab tak to dāman bachātī rahī tū bhī dāman bachā.e to maiñ kyā karūñ

tū na samjhegā hargiz mire nāsehā merī mai-noshiyāñ merī badmastiyāñ

mujh pe tohmat na rakh maiñ sharābī nahīñ vo nazar se pilā.e to maiñ kyā karūñ

tum mujhe bevafā.ī ke taane na do mere mahbūb maiñ bevafā to nahīñ

tum bhī maġhrūr ho maiñ bhī ḳhuddār huuñ aañkh ḳhud hī bhar aa.e to maiñ kyā karūñ

wada-e-sham-e-farda pe ai dil mujhe gar yaqin hi na aae to main kya karun

un ki jhuTi tasalli ke tufan mein nabz-e-dil Dub jae to main kya karun

main ne mangi thi ye masjidon mein dua main jise chahta hun wo mujh ko mile

jo mera farz tha main ne pura kiya ab KHuda bhul jae to main kya karun

sare jhagDe agar mere jine ke hain to gala ghonT do main bhi be-zar hun

maut ab tak to daman bachati rahi tu bhi daman bachae to main kya karun

tu na samjhega hargiz mere naseha meri mai-noshiyan meri badmastiyan

mujh pe tohmat na rakh main sharabi nahin wo nazar se pilae to main kya karun

tum mujhe bewafai ke tane na do mere mahbub main bewafa to nahin

tum bhi maghrur ho main bhi KHuddar hun aankh KHud hi bhar aae to main kya karun