wada-e-wasl-e-adu aaj wafa ho ki na ho

va.ada-e-vasl-e-adū aaj vafā ho ki na ho

naala kartā to huuñ maiñ hashr bapā ho ki na ho

hausla aap kā go sirf jafā ho ki na ho

maiñ kiye jā.ūñ vafā mujh se vafā ho ki na ho

dil-e-muztar ko tum ifshā kī malāmat na karo

dil rahā ho to sahī hosh-rubā ho ki na ho

zindagī kā na milā lutf tirī furqat meñ

ab to mar jā.eñge marne meñ maza ho ki na ho

mā.il-e-tark-e-sitam terī adā ho ki na ho

misl mere koī pāband-e-razā ho ki na ho

aaj to kholne do tā na rahe shak baaqī

aap kā band-e-qabā uqda-kushā ho ki na ho

rabt maqsūd hai ārām-o-musībat kaisī

maiñ to kartā huuñ vafā mujh pe jafā ho ki na ho

ham to mai piite haiñ furqat ke maze lete haiñ

maraz-e-hijr kī duniyā meñ davā ho ki na ho

umr meñ mujh se tujhe ahd to karnā hai zarūr

umr meñ tujh se koī ahd vafā ho ki na ho

kal shab-e-vasl-e-adū 'lutf' to aaya hogā

rashk se aap se shāyad ki milā ho ki na ho

wada-e-wasl-e-adu aaj wafa ho ki na ho

nala karta to hun main hashr bapa ho ki na ho

hausla aap ka go sirf jafa ho ki na ho

main kiye jaun wafa mujh se wafa ho ki na ho

dil-e-muztar ko tum ifsha ki malamat na karo

dil raha ho to sahi hosh-ruba ho ki na ho

zindagi ka na mila lutf teri furqat mein

ab to mar jaenge marne mein maza ho ki na ho

mail-e-tark-e-sitam teri ada ho ki na ho

misl mere koi paband-e-raza ho ki na ho

aaj to kholne do ta na rahe shak baqi

aap ka band-e-qaba uqda-kusha ho ki na ho

rabt maqsud hai aaram-o-musibat kaisi

main to karta hun wafa mujh pe jafa ho ki na ho

hum to mai pite hain furqat ke maze lete hain

maraz-e-hijr ki duniya mein dawa ho ki na ho

umr mein mujh se tujhe ahd to karna hai zarur

umr mein tujh se koi ahd wafa ho ki na ho

kal shab-e-wasl-e-adu 'lutf' to aaya hoga

rashk se aap se shayad ki mila ho ki na ho