wada-e-wasl hai lazzat-e-intizar uTha

vāda-e-vasl hai lazzat-e-intizār uThā

aur phir umr bhar ik ġham-e-e'tibār uThā

us kā ġham mere dil meñ hai ab bāñsurī kī tarah

naġhma-e-dard se zaḳhma-e-iḳhtiyār uThā

maiñ uThā to falak se bahut chāñd taare gire

aur sahrā-e-jāñ meñ bahut ġham-e-ġhubār uThā

kuchh rahā mere dil meñ to ik iztirāb rahā

maiñ sadā apnī hī ḳhaak se be-qarār uThā

ai ḳhudā rizq-e-parvāz de shahparoñ ko mire

mere atrāf se āsmāñ kā hisār uThā

tū mujhe āsmāñ de na de be-zamīn na kar

dasht-e-jāñ se mire mausam-e-tāb-kār uThā

yā mirī aañkh se chhīn le sab ḳhazāna-e-ḳhvāb

yā mirī ḳhaak se zindagī kā fishār uThā

wada-e-wasl hai lazzat-e-intizar uTha

aur phir umr bhar ek gham-e-e'tibar uTha

us ka gham mere dil mein hai ab bansuri ki tarah

naghma-e-dard se zaKHma-e-iKHtiyar uTha

main uTha to falak se bahut chand tare gire

aur sahra-e-jaan mein bahut gham-e-ghubar uTha

kuchh raha mere dil mein to ek iztirab raha

main sada apni hi KHak se be-qarar uTha

ai KHuda rizq-e-parwaz de shahparon ko mere

mere atraf se aasman ka hisar uTha

tu mujhe aasman de na de be-zamin na kar

dasht-e-jaan se mere mausam-e-tab-kar uTha

ya meri aankh se chhin le sab KHazana-e-KHwab

ya meri KHak se zindagi ka fishaar uTha