wada-KHilaf kitne hain ai rashk-e-mah aap

va.ada-ḳhilāf kitne haiñ ai rashk-e-māh aap

sach to ye hai ki jhūToñ ke haiñ bādshāh aap

daftar siyāh karte haiñ kyuuñ kātib-e-amal

huuñ maġhrib gunāhoñ kā maiñ rū-siyāh aap

ham se to dil meñ aap ke ab tak na ghar huā

kar lete haiñ diloñ meñ ye kis tarah raah aap

ye gah bhī kafsh-ḳhāna hai āḳhir huzūr kā

tashrīf yaañ bhī laayā kareñ gaah gaah aap

mahshar talak rahegā in āñkhoñ ko shauq-e-dīd

dekheñ ki ab dikhāte haiñ tā-chand raah aap

tashbīh naam āñkhoñ kī hai sūjhnā muhāl

saarī bayāz karte haiñ nā-haq siyāh aap

kuchh husn hī haiñ afsar-e-ḳhūbāñ nahīñ huzūr

haiñ mulk-e-ān-o-nāz ke bhī bādshāh aap

aariz abhī haiñ ruup pe ḳhat aane dījiye

kar lījiyegā farq-e-safed-o-siyāh aap

kyuuñ us ne kū-e-yār se bāhar nikāle paañv

majnūñ huā hai haath se apne tabāh aap

kalima paḌhe huzūr kā dekhe jo sāmrī

rakhte haiñ aisī sehr kī chashm-o-nigāh aap

sab āshiqoñ ke ek se hote nahīñ chain

khoTā kharā parakhne kī rakhiye nigāh aap

darmāndoñ kā hai kaun ba-juz un ke dast-gīr

apne apāhijoñ ko vo leñge nibāh aap

mujh rū-siyah kī hai ye duā vaqt-e-bāz-purs

rakhiyegā apne lutf-o-karam par nigāh aap

ulfat kā kyā yahī hai natīja jahān meñ

āshiq ko qatl karte haiñ kyuuñ be-gunāh aap

dil de ke bahr-e-fikr meñ ho ġhota-zan abas

dariyā-e-ishq kī nahīñ pā.eñge thaah aap

azm-e-safar to mulk-e-adam kā hai ai 'qalaq'

kuchh apne saath le bhī chale zād-e-rāh aap

wada-KHilaf kitne hain ai rashk-e-mah aap

sach to ye hai ki jhuTon ke hain baadshah aap

daftar siyah karte hain kyun katib-e-amal

hun maghrib gunahon ka main ru-siyah aap

hum se to dil mein aap ke ab tak na ghar hua

kar lete hain dilon mein ye kis tarah rah aap

ye gah bhi kafsh-KHana hai aaKHir huzur ka

tashrif yan bhi laya karen gah gah aap

mahshar talak rahega in aankhon ko shauq-e-did

dekhen ki ab dikhate hain ta-chand rah aap

tashbih nam aankhon ki hai sujhna muhaal

sari bayaz karte hain na-haq siyah aap

kuchh husn hi hain afsar-e-KHuban nahin huzur

hain mulk-e-an-o-naz ke bhi baadshah aap

aariz abhi hain rup pe KHat aane dijiye

kar lijiyega farq-e-safed-o-siyah aap

kyun us ne ku-e-yar se bahar nikale panw

majnun hua hai hath se apne tabah aap

kalima paDhe huzur ka dekhe jo samri

rakhte hain aisi sehr ki chashm-o-nigah aap

sab aashiqon ke ek se hote nahin chain

khoTa khara parakhne ki rakhiye nigah aap

darmandon ka hai kaun ba-juz un ke dast-gir

apne apahijon ko wo lenge nibah aap

mujh ru-siyah ki hai ye dua waqt-e-baz-purs

rakhiyega apne lutf-o-karam par nigah aap

ulfat ka kya yahi hai natija jahan mein

aashiq ko qatl karte hain kyun be-gunah aap

dil de ke bahr-e-fikr mein ho ghota-zan abas

dariya-e-ishq ki nahin paenge thah aap

azm-e-safar to mulk-e-adam ka hai ai 'qalaq'

kuchh apne sath le bhi chale zad-e-rah aap