wada-o-qaul-o-qasam ne mujhe jine na diya

vāda-o-qaul-o-qasam ne mujhe jiine na diyā

kyā sitam hai ki karam ne mujhe jiine na diyā

dil to āmāda-e-ġham thā ba-īñ barbādī-e-jāñ

magar andāza-e-ġham ne mujhe jiine na diyā

nāz-bardār-e-savāl-e-dil-e-pur-ḳhūñ na milā

kāsa-e-dīda-e-nam ne mujhe jiine na diyā

tū jafā-pesha hai kis muñh se kahūñ duniyā se

apnī chāhat ke bharam ne mujhe jiine na diyā

ek nādīda ḳhudā ne mire naale na sune

ek patthar ke sanam ne mujhe jiine na diyā

ek saa.e kā karam hai tapish-e-jāñ pe hanūz

ek dīvār ke ḳham ne mujhe jiine na diyā

sher likhtā huuñ ki taqdīr-e-tamannā ai 'shāz'

hunar-e-lauh-o-qalam ne mujhe jiine na diyā

wada-o-qaul-o-qasam ne mujhe jine na diya

kya sitam hai ki karam ne mujhe jine na diya

dil to aamada-e-gham tha ba-in barbaadi-e-jaan

magar andaza-e-gham ne mujhe jine na diya

naz-bardar-e-sawal-e-dil-e-pur-KHun na mila

kasa-e-dida-e-nam ne mujhe jine na diya

tu jafa-pesha hai kis munh se kahun duniya se

apni chahat ke bharam ne mujhe jine na diya

ek nadida KHuda ne mere nale na sune

ek patthar ke sanam ne mujhe jine na diya

ek sae ka karam hai tapish-e-jaan pe hanuz

ek diwar ke KHam ne mujhe jine na diya

sher likhta hun ki taqdir-e-tamanna ai 'shaz'

hunar-e-lauh-o-qalam ne mujhe jine na diya