wada raha na yaad mere mast-e-KHwab ko

va.ada rahā na yaad mire mast-e-ḳhvāb ko

ab kyā javāb duuñ dil-e-pur-iztirāb ko

zebā ġhurūr-o-nāz thā tere shabāb ko

Thukrā diyā mire dil-e-ḳhāna-ḳharāb ko

chamke jo dāġh-e-dil mire roz-e-siyāh meñ

taare dikhā.ī dene lage āftāb ko

maidān-e-hashr meñ na qayāmat bapā ho aur

maiñ dil sañbhālūñ aap sañbhāleñ naqāb ko

lākhoñ meñ chun liyā tumheñ roz-e-shumār bhī

dekho zarā mirī nigah-e-intiḳhāb ko

bhar aa.ī aañkh jab kabhī yaad aa ga.ī vo raat

bhūlā na aaj tak maiñ javānī ke ḳhvāb ko

'safdar' kahāñ maiñ aur kahāñ hazrat-e-riyāz

nisbat magar charāġh se hai āftāb ko

wada raha na yaad mere mast-e-KHwab ko

ab kya jawab dun dil-e-pur-iztirab ko

zeba ghurur-o-naz tha tere shabab ko

Thukra diya mere dil-e-KHana-KHarab ko

chamke jo dagh-e-dil mere roz-e-siyah mein

tare dikhai dene lage aaftab ko

maidan-e-hashr mein na qayamat bapa ho aur

main dil sanbhaalun aap sanbhaalen naqab ko

lakhon mein chun liya tumhein roz-e-shumar bhi

dekho zara meri nigah-e-intiKHab ko

bhar aai aankh jab kabhi yaad aa gai wo raat

bhula na aaj tak main jawani ke KHwab ko

'safdar' kahan main aur kahan hazrat-e-riyaz

nisbat magar charagh se hai aaftab ko