وعدے ان حسینوں کے وفا ہو نہیں سکتے

وعدے ان حسینوں کے وفا ہو نہیں سکتے

پتھر کے صنم ہیں یہ خدا ہو نہیں سکتے

اک عمر چبھے ہیں مری آنکھوں میں جو آنسو

وہ تو مرے زخموں کی دوا ہو نہیں سکتے

فکر غم دنیا ہے کبھی فکر غم دل

احسان زمانے کے ادا ہو نہیں سکتے

اک شوخ نے یوں دل کو دکھایا ہے کہ یارو

سینے سے مرے ہاتھ جدا ہو نہیں سکتے

جذبات جو اک عمر سے اس دل میں نہاں ہیں

الفاظ میں اے یار ادا ہو نہیں سکتے

جنت ملے اب یا نہ ملے لیکن ایازؔ ہم

اس بت سے کسی طرح جدا ہو نہیں سکتے