wade par etibar ki ghaDiyan

vā'de par e'tibār kī ghaḌiyāñ

iztirāb-o-qarār kī ghaḌiyāñ

dil kī dhaḌkan pa gin rahe haiñ ham

aap ke intizār kī ghaḌiyāñ

kuchh yaqīñ kuchh gumāñ meñ kaaTī haiñ

ham ne lail-o-nahār kī ghaḌiyāñ

yād-e-māzī umīd-e-mustaqbil

dil ke ġharq aur ubhār kī ghaḌiyāñ

haiñ mayassar junūñ ke sadqe meñ

dasht meñ bhī bahār kī ghaḌiyāñ

aap kī ek nazar kī qīmat haiñ

dil ke sabr-o-qarār kī ghaḌiyāñ

haiñ mire ijz-o-inkisār talak

terī shān-o-vaqār kī ghaḌiyāñ

mil rahī haiñ 'shamīm' ke dam tak

bāġh-o-gul ko bahār kī ghaḌiyāñ

wa'de par e'tibar ki ghaDiyan

iztirab-o-qarar ki ghaDiyan

dil ki dhaDkan pa gin rahe hain hum

aap ke intizar ki ghaDiyan

kuchh yaqin kuchh guman mein kaTi hain

hum ne lail-o-nahaar ki ghaDiyan

yaad-e-mazi umid-e-mustaqbil

dil ke gharq aur ubhaar ki ghaDiyan

hain mayassar junun ke sadqe mein

dasht mein bhi bahaar ki ghaDiyan

aap ki ek nazar ki qimat hain

dil ke sabr-o-qarar ki ghaDiyan

hain mere ijz-o-inkisar talak

teri shan-o-waqar ki ghaDiyan

mil rahi hain 'shamim' ke dam tak

bagh-o-gul ko bahaar ki ghaDiyan