wadi-e-qalb ke haalat tumhein kya malum

vādī-e-qalb ke hālāt tumheñ kyā ma.alūm

kiyā sitam dhāte haiñ jazbāt tumheñ kyā ma.alūm

tum ne har vaqt hī ḳhushiyoñ ke ujāle dekhe

ġham kī hotī hai siyah raat tumheñ kyā ma.alūm

mere ash.ār uThāte haiñ savālāt magar

ḳhaak tum doge javābāt tumheñ kyā ma.alūm

tum hameñ bhuul ga.e aish-o-tarab meñ lekin

ham ne bhūlī na koī baat tumheñ kyā ma.alūm

tum ne dī hai vo mohabbat meñ daġhā kyā jaano

pyaar ko kaise milī maat tumheñ kyā ma.alūm

ḳhushk hoñToñ ne jab allāh-nigahbān kahā

kaise āñkhoñ ne kī barsāt tumheñ kyā ma.alūm

tum to shādāñ the ki bas haar gayā hai 'maqsūd'

kis kī dar-asl huī maat tumheñ kyā ma.alūm

wadi-e-qalb ke haalat tumhein kya malum

kiya sitam dhate hain jazbaat tumhein kya malum

tum ne har waqt hi KHushiyon ke ujale dekhe

gham ki hoti hai siyah raat tumhein kya malum

mere ashaar uThate hain sawalat magar

KHak tum doge jawabaat tumhein kya malum

tum hamein bhul gae aish-o-tarab mein lekin

hum ne bhuli na koi baat tumhein kya malum

tum ne di hai wo mohabbat mein dagha kya jaano

pyar ko kaise mili mat tumhein kya malum

KHushk honTon ne jab allah-nigahban kaha

kaise aankhon ne ki barsat tumhein kya malum

tum to shadan the ki bas haar gaya hai 'maqsud'

kis ki dar-asl hui mat tumhein kya malum