wadi-e-shauq mein jo shoala-ba-daman nikla

vādī-e-shauq meñ jo sho.ala-ba-dāmāñ niklā

vāqif-e-rasm-o-rah-e-kūcha-e-jānāñ niklā

fikr-e-fardā ġham-e-doshīna se āzād huā

ḳhush-nasīb apnā dil-e-soḳhta-sāmāñ niklā

tujh se ummīd ho kyā dasht-navardoñ ko bahār

terā har hausla pāband-e-gulistāñ niklā

fasl-e-gul rang-e-chaman qāfila-e-abr-e-bahār

in meñ koī na sharīk-e-ġham-e-insāñ niklā

kyā sitam hai dil-e-nāshād ko ye daur-e-bahār

nāz-parvarda-e-arbāb-e-gulistāñ niklā

fahm-o-idrāk se aage hai yaqīñ kī manzil

aql kā ijz hī sar-chashma-e-īmāñ niklā

jāvedāñ ho na sakī umr baḌī ḳhair huī

ġham-zada ziist pe ye bhī tirā ehsāñ niklā

harf-gīrī to huī dast-e-zuleḳhā pe magar

shauq har haal meñ vābasta-e-dāmāñ niklā

wadi-e-shauq mein jo shoala-ba-daman nikla

waqif-e-rasm-o-rah-e-kucha-e-jaanan nikla

fikr-e-farda gham-e-doshina se aazad hua

KHush-nasib apna dil-e-soKHta-saman nikla

tujh se ummid ho kya dasht-nawardon ko bahaar

tera har hausla paband-e-gulistan nikla

fasl-e-gul rang-e-chaman qafila-e-abr-e-bahaar

in mein koi na sharik-e-gham-e-insan nikla

kya sitam hai dil-e-nashad ko ye daur-e-bahaar

naz-parwarda-e-arbab-e-gulistan nikla

fahm-o-idrak se aage hai yaqin ki manzil

aql ka ijz hi sar-chashma-e-iman nikla

jawedan ho na saki umr baDi KHair hui

gham-zada zist pe ye bhi tera ehsan nikla

harf-giri to hui dast-e-zuleKHa pe magar

shauq har haal mein wabasta-e-daman nikla