وادئ شوق میں جو شعلہ بداماں نکلا

وادئ شوق میں جو شعلہ بداماں نکلا

واقف رسم و رہ کوچۂ جاناں نکلا

فکر فردا غم دوشینہ سے آزاد ہوا

خوش نصیب اپنا دل سوختہ ساماں نکلا

تجھ سے امید ہو کیا دشت نوردوں کو بہار

تیرا ہر حوصلہ پابند گلستاں نکلا

فصل گل رنگ چمن قافلۂ ابر بہار

ان میں کوئی نہ شریک غم انساں نکلا

کیا ستم ہے دل ناشاد کو یہ دور بہار

ناز پروردۂ ارباب گلستاں نکلا

فہم و ادراک سے آگے ہے یقیں کی منزل

عقل کا عجز ہی سر چشمۂ ایماں نکلا

جاوداں ہو نہ سکی عمر بڑی خیر ہوئی

غم زدہ زیست پہ یہ بھی ترا احساں نکلا

حرف گیری تو ہوئی دست زلیخا پہ مگر

شوق ہر حال میں وابستۂ داماں نکلا