wae qismat ki qarib usne na aana chaha

vaa.e qismat ki qarīb us ne na aanā chāhā

umr bhar ham ne jise apnā banānā chāhā

kyā kaheñ us ko ġham-e-duniyā ne kitnā gherā

ham ne jis dil ko tire ġham se sajānā chāhā

kar diyā aur bhī mad.hosh zamāne ne use

tere dīvāne ne jab hosh meñ aanā chāhā

ho ga.ī aur sivā lazzat-e-ġham kī tāsīr

jab kabhī ham ne tire ġham ko bhulānā chāhā

vaqt ke sho.aloñ se mahfūz bhalā kyā rahte

yuuñ to dāman ko bahut ham ne bachānā chāhā

terī yādoñ ke diye jalte rahe jalte rahe

āñdhiy.oñ ne to ka.ī baar bujhānā chāhā

bas isī jurm pe nārāz haiñ duniyā vaale

apne ḳhvāboñ kā mahal ham ne banānā chāhā

jo uThā us ko girāne kī to sochī sab ne

jo girā us ko na duniyā ne uThānā chāhā

qasr-o-aivāñ kā girānā to koī baat na thī

ka.aba-e-dil ko bhī kuchh logoñ ne Dhānā chāhā

jab bhī sochā ki haqīqat na chhupā.eñ 'qādir'

ham se duniyā ne nayā koī bahānā chāhā

wae qismat ki qarib us ne na aana chaha

umr bhar hum ne jise apna banana chaha

kya kahen us ko gham-e-duniya ne kitna ghera

hum ne jis dil ko tere gham se sajaana chaha

kar diya aur bhi madhosh zamane ne use

tere diwane ne jab hosh mein aana chaha

ho gai aur siwa lazzat-e-gham ki tasir

jab kabhi hum ne tere gham ko bhulana chaha

waqt ke shoalon se mahfuz bhala kya rahte

yun to daman ko bahut hum ne bachana chaha

teri yaadon ke diye jalte rahe jalte rahe

aandhiyon ne to kai bar bujhana chaha

bas isi jurm pe naraaz hain duniya wale

apne KHwabon ka mahal hum ne banana chaha

jo uTha us ko girane ki to sochi sab ne

jo gira us ko na duniya ne uThana chaha

qasr-o-aiwan ka girana to koi baat na thi

kaba-e-dil ko bhi kuchh logon ne Dhana chaha

jab bhi socha ki haqiqat na chhupaen 'qadir'

hum se duniya ne naya koi bahana chaha