wah kya aalam ajab hai intizar-e-yar ka

vaah kyā aalam ajab hai intizār-e-yār kā

naam hai dīdār-e-hasrat hasrat-e-dīdār kā

sair hai jannat kī sairoñ se tire āshiq kā dil

le ke jannat kyā kare bhūkā tire dīdār kā

zarra-e-dil meñ utar aa.e hazāroñ āftāb

kyā karishma hai ḳhyāl-e-jalva-gāh-e-yār kā

baḌh chalā thā terī ġhaflat se bhī bār-e-bekasī

maut ne pūchhā mizāj aa kar tire bīmār kā

jānte haiñ ik jhalak meñ jān-o-dil miT jā.eñge

log muñh takte haiñ tere tālib-e-dīdār kā

dhyān meñ us ke do-ālam se khiñchā baiThā huuñ maiñ

ya.anī ik naqsha khiñchā hai jazb-e-husn-e-yār kā

jis ko kahte haiñ muqaddar āshiqān-e-bad-nasīb

hai vo ik bigḌā huā ḳhāka mizāj-e-yār kā

wah kya aalam ajab hai intizar-e-yar ka

nam hai didar-e-hasrat hasrat-e-didar ka

sair hai jannat ki sairon se tere aashiq ka dil

le ke jannat kya kare bhuka tere didar ka

zarra-e-dil mein utar aae hazaron aaftab

kya karishma hai KHyal-e-jalwa-gah-e-yar ka

baDh chala tha teri ghaflat se bhi bar-e-bekasi

maut ne puchha mizaj aa kar tere bimar ka

jaante hain ek jhalak mein jaan-o-dil miT jaenge

log munh takte hain tere talib-e-didar ka

dhyan mein us ke do-alam se khincha baiTha hun main

yani ek naqsha khincha hai jazb-e-husn-e-yar ka

jis ko kahte hain muqaddar aashiqan-e-bad-nasib

hai wo ek bigDa hua KHaka mizaj-e-yar ka