wah kya faizan-e-chashm-e-nargis-e-mastana tha

vaah kyā faizān-e-chashm-e-nargis-e-mastāna thā

jis taraf nazreñ uThīñ mai-ḳhāna hī mai-ḳhāna thā

vus.at-e-kaunain meñ dil bhī ajab kāshāna thā

ka.aba kā ka.aba thā aur but-ḳhāna kā but-ḳhāna thā

dar-haqīqat saarā aalam ishq se begāna thā

varna ye unvān ḳhud apnī jagah afsāna thā

aah kab be-mā.egī meñ saath detā hai koī

jab surāhī ho ga.ī ḳhālī judā paimāna thā

sab kī jānib multafit the bazm meñ mere sivā

un kā ye andāz bhī andāz-e-ma.asūmāna thā

sunte sunte un kī bhī āñkhoñ meñ aañsū aa ga.e

kis qadar dil-soz mere ishq kā afsāna thā

tum ne jalvoñ se dil-e-'mūsā' ko raushan kar diyā

varna is se peshtar tārīk ye kāshāna thā

wah kya faizan-e-chashm-e-nargis-e-mastana tha

jis taraf nazren uThin mai-KHana hi mai-KHana tha

wusat-e-kaunain mein dil bhi ajab kashana tha

kaba ka kaba tha aur but-KHana ka but-KHana tha

dar-haqiqat sara aalam ishq se begana tha

warna ye unwan KHud apni jagah afsana tha

aah kab be-maegi mein sath deta hai koi

jab surahi ho gai KHali juda paimana tha

sab ki jaanib multafit the bazm mein mere siwa

un ka ye andaz bhi andaz-e-masumana tha

sunte sunte un ki bhi aankhon mein aansu aa gae

kis qadar dil-soz mere ishq ka afsana tha

tum ne jalwon se dil-e-'musa' ko raushan kar diya

warna is se peshtar tarik ye kashana tha