wahime ki ye mashq-e-paiham kya

vāhime kī ye mashq-e-paiham kyā

yaas o ummīd shādī o ġham kyā

tum ko is rāz-e-mā-sivā kī qasam

tum pe chhāyā huā hai aalam kyā

un ke aage ġham ik fasāna hai

un se kahiye fasāna-e-ġham kyā

aish-e-rafta kī yaad se hāsil

qissa-e-ḳhuld o zikr-e-ādam kyā

tā-kujā āh-e-zer-e-lab āḳhir

intihā-e-sukūt barham kyā

ġham-e-duniyā ba-qadr-e-zarf nahīñ

hasrat-e-besh o shikva-e-kam kyā

soz-e-ġham kī hadeñ nahīñ miltīñ

bujh ga.ī ātish-e-jahannam kyā

garm-o-sard-e-zamāna jo kuchh ho

varna firdaus kyā jahannam kyā

maut jis kī hayāt ho 'fānī'

us shahīd-e-sitam kā mātam kyā

wahime ki ye mashq-e-paiham kya

yas o ummid shadi o gham kya

tum ko is raaz-e-ma-siwa ki qasam

tum pe chhaya hua hai aalam kya

un ke aage gham ek fasana hai

un se kahiye fasana-e-gham kya

aish-e-rafta ki yaad se hasil

qissa-e-KHuld o zikr-e-adam kya

ta-kuja aah-e-zer-e-lab aaKHir

intiha-e-sukut barham kya

gham-e-duniya ba-qadr-e-zarf nahin

hasrat-e-besh o shikwa-e-kam kya

soz-e-gham ki haden nahin miltin

bujh gai aatish-e-jahannam kya

garm-o-sard-e-zamana jo kuchh ho

warna firdaus kya jahannam kya

maut jis ki hayat ho 'fani'

us shahid-e-sitam ka matam kya