waiz-e-shahr ke atwar badalne se raha

vā.iz-e-shahr ke atvār badalne se rahā

maiñ kisī shaḳhs kā kirdār badalne se rahā

aap ko honā paḌegā zarā is kā 'aadī

maiñ to ghar ke dar-o-dīvār badalne se rahā

ab safar se to ye behtar hai ki ghar meñ baiThūñ

rāsta qāfila-sālār badalne se rahā

baa'z chīzoñ kā badalnā nahīñ mumkin jaise

aa.ina ā.ina-bardār badalne se rahā

sirf in do pe mirā zor nahīñ chal saktā

sar badalne se yā sarkār badalne se rahā

kitne badle haiñ tire husn ke mausam lekin

bas tirā tālib-e-dīdār badalne se rahā

maiñ ne koshish to bahut kī hai magar 'ḳhālid' jī

kashish-e-dirham-o-dīnār badalne se rahā

waiz-e-shahr ke atwar badalne se raha

main kisi shaKHs ka kirdar badalne se raha

aap ko hona paDega zara is ka 'adi

main to ghar ke dar-o-diwar badalne se raha

ab safar se to ye behtar hai ki ghar mein baiThun

rasta qafila-salar badalne se raha

ba'z chizon ka badalna nahin mumkin jaise

aaina aaina-bardar badalne se raha

sirf in do pe mera zor nahin chal sakta

sar badalne se ya sarkar badalne se raha

kitne badle hain tere husn ke mausam lekin

bas tera talib-e-didar badalne se raha

main ne koshish to bahut ki hai magar 'KHalid' ji

kashish-e-dirham-o-dinar badalne se raha