واعظ شہر کے اطوار بدلنے سے رہا

واعظ شہر کے اطوار بدلنے سے رہا

میں کسی شخص کا کردار بدلنے سے رہا

آپ کو ہونا پڑے گا ذرا اس کا عادی

میں تو گھر کے در و دیوار بدلنے سے رہا

اب سفر سے تو یہ بہتر ہے کہ گھر میں بیٹھوں

راستہ قافلہ سالار بدلنے سے رہا

بعض چیزوں کا بدلنا نہیں ممکن جیسے

آئنہ آئنہ بردار بدلنے سے رہا

صرف ان دو پہ مرا زور نہیں چل سکتا

سر بدلنے سے یا سرکار بدلنے سے رہا

کتنے بدلے ہیں ترے حسن کے موسم لیکن

بس ترا طالب دیدار بدلنے سے رہا

میں نے کوشش تو بہت کی ہے مگر خالدؔ جی

کشش درہم و دینار بدلنے سے رہا