waiz-e-shahr KHuda hai mujhe malum na tha

vā.iz-e-shahr ḳhudā hai mujhe mā'lūm na thā

yahī bande kī ḳhatā hai mujhe mā'lūm na thā

ġham-e-daurāñ kā mudāvā na huā par na huā

haath meñ kis ke shifā hai mujhe mā'lūm na thā

naġhma-e-nai bhī na ho bāñg-e-bat-e-mai bhī na ho

ye bhī jiine kī adā hai mujhe mā'lūm na thā

maiñ samajhtā thā jise haikal o mehrāb o kunisht

merā naqsh-e-kaf-e-pā hai mujhe mā'lūm na thā

apne hī saaz kī āvāz pe hairāñ thā maiñ

zaḳhma-e-sāz nayā hai mujhe mā'lūm na thā

jis kī iimā pe kiyā shaiḳh ne bandoñ ko halāk

vahī bandoñ kā ḳhudā hai mujhe mā'lūm na thā

ḳhutba tarġhīb-e-halākat kā ravā hai ai dost

she'r kahne kī sazā hai mujhe mā'lūm na thā

shab-e-hijrāñ kī darāzī se pareshān na thā

ye tirī zulf-e-rasā hai mujhe mā'lūm na thā

vo mujhe mashvara-e-tark-e-vafā dete the

ye mohabbat kī adā hai mujhe mā'lūm na thā

chehra khole nazar aatī thī urūs-e-gul-nār

muñh pe shabnam kī ridā hai mujhe mā'lūm na thā

kufr o īmāñ kī hadeñ kis ne ta'ayyun kī thiiñ

is pe hangāma bapā hai mujhe mā'lūm na thā

yahī mār-e-do-zabāñ merā lahū chaaT gayā

rahnumā ek balā hai mujhe mā'lūm na thā

'ajab andāz se thā koī ġhazal-ḳhvāñ kal raat

'ābid'-e-sho.ala-navā hai mujhe mā'lūm na thā

waiz-e-shahr KHuda hai mujhe ma'lum na tha

yahi bande ki KHata hai mujhe ma'lum na tha

gham-e-dauran ka mudawa na hua par na hua

hath mein kis ke shifa hai mujhe ma'lum na tha

naghma-e-nai bhi na ho bang-e-bat-e-mai bhi na ho

ye bhi jine ki ada hai mujhe ma'lum na tha

main samajhta tha jise haikal o mehrab o kunisht

mera naqsh-e-kaf-e-pa hai mujhe ma'lum na tha

apne hi saz ki aawaz pe hairan tha main

zaKHma-e-saz naya hai mujhe ma'lum na tha

jis ki ima pe kiya shaiKH ne bandon ko halak

wahi bandon ka KHuda hai mujhe ma'lum na tha

KHutba targhib-e-halakat ka rawa hai ai dost

she'r kahne ki saza hai mujhe ma'lum na tha

shab-e-hijran ki daraazi se pareshan na tha

ye teri zulf-e-rasa hai mujhe ma'lum na tha

wo mujhe mashwara-e-tark-e-wafa dete the

ye mohabbat ki ada hai mujhe ma'lum na tha

chehra khole nazar aati thi urus-e-gul-nar

munh pe shabnam ki rida hai mujhe ma'lum na tha

kufr o iman ki haden kis ne ta'ayyun ki thin

is pe hangama bapa hai mujhe ma'lum na tha

yahi mar-e-do-zaban mera lahu chaT gaya

rahnuma ek bala hai mujhe ma'lum na tha

'ajab andaz se tha koi ghazal-KHwan kal raat

'abid'-e-shoala-nawa hai mujhe ma'lum na tha