waiz mariz hun main kisi ki nigah ka

vaa.iz marīz huuñ maiñ kisī kī nigāh kā

mujh par asar na hogā tire intibāh kā

tasvīr un ke āriz-e-zebā kī hai sahar

raat ek aks hai mire hāl-e-tabāh kā

un ko kiyā pasand to ḳhud ho gayā pasand

aalam hai mo'tarif mire zauq-e-nigāh kā

nūr-e-mohammad-e-arabī mere dil meñ hai

surma hai merī aañkh meñ yasrib kī raah kā

jin kī jabīñ ne sajda-e-ḳhāk-e-haram kiyā

ūñchā hai sab se gosha unhīñ kī kulāh kā

ai zauq-e-dīd shān-e-shab-e-māhtāb dekh

ā.īna hai ye husn kī jaulān-gāh kā

go mujh ko hasrat-e-karam-e-mustaqil nahīñ

ḳhvāhāñ hai dil magar sitam-e-gāh-gāh kā

waiz mariz hun main kisi ki nigah ka

mujh par asar na hoga tere intibah ka

taswir un ke aariz-e-zeba ki hai sahar

raat ek aks hai mere haal-e-tabah ka

un ko kiya pasand to KHud ho gaya pasand

aalam hai mo'tarif mere zauq-e-nigah ka

nur-e-mohammad-e-arabi mere dil mein hai

surma hai meri aankh mein yasrib ki rah ka

jin ki jabin ne sajda-e-KHak-e-haram kiya

uncha hai sab se gosha unhin ki kulah ka

ai zauq-e-did shan-e-shab-e-mahtab dekh

aaina hai ye husn ki jaulan-gah ka

go mujh ko hasrat-e-karam-e-mustaqil nahin

KHwahan hai dil magar sitam-e-gah-gah ka