waqia mazi ka hai lagti hai jaise kal ki baat

vāqi'a maazī kā hai lagtī hai jaise kal kī baat

kyā batā.ūñ kitnī gahrī thī vo dil kī vārdāt

baa'd marne ke hī shāyad zindagī āsān ho

zindagī meñ dard se mumkin nahīñ hargiz najāt

lag rahā hai bevafā.ī kar rahe ho āj-kal

kuchh ziyāda hī dukhāne lag ga.e ho iltifāt

āsmāñ se ik sitāra TūTne kā ġham nahīñ

TūTte haiñ jab sitāre phailtī hai kā.enāt

ab yahāñ mehr-o-vafā kī koī qīmat hī nahīñ

māl-o-zar ho paas jis ke ab vahī hai bā-sifāt

hashr meñ ḳhāKī badan ko phir se joḌā jā.egā

jism-e-ḳhākī se kahāñ miltī hai bande ko najāt

kuchh hai is kī jeb meñ to kuchh hai us kī jeb meñ

is liye to haiñ baqāyā ġhair-mulkī vājibāt

ik nazar Daalī thī bachpan kī taraf 'shamsa-najam'

yaad aane lag ga.e haiñ 'umr bhar ke vāqi'āt

waqi'a mazi ka hai lagti hai jaise kal ki baat

kya bataun kitni gahri thi wo dil ki wardat

ba'd marne ke hi shayad zindagi aasan ho

zindagi mein dard se mumkin nahin hargiz najat

lag raha hai bewafai kar rahe ho aaj-kal

kuchh ziyaada hi dukhane lag gae ho iltifat

aasman se ek sitara TuTne ka gham nahin

TuTte hain jab sitare phailti hai kaenat

ab yahan mehr-o-wafa ki koi qimat hi nahin

mal-o-zar ho pas jis ke ab wahi hai ba-sifat

hashr mein KHaKi badan ko phir se joDa jaega

jism-e-KHaki se kahan milti hai bande ko najat

kuchh hai is ki jeb mein to kuchh hai us ki jeb mein

is liye to hain baqaya ghair-mulki wajibaat

ek nazar Dali thi bachpan ki taraf 'shamsa-najam'

yaad aane lag gae hain 'umr bhar ke waqi'at