waqia dasht-nawardi hua aasan mujh tak

vāqi.a dasht-navardī huā āsāñ mujh tak

bin-bulā.e chalā aatā hai bayābāñ mujh tak

kunj-e-āġhosh-e-junūñ tangī-e-furqat se farār

ik suhūlat se khiñche dāman-e-paimāñ mujh tak

rauzan-e-hijr sukūt-e-shab-e-vahshat meñ khulā

jalva-e-nūr huā nāla-e-mizhgāñ mujh tak

thī jise shohrat-e-asbāb-e-kushāda kī talāsh

aa ke mash.hūr huā be-sar-o-sāmāñ mujh tak

rang-e-ā.īna rag-e-sang se niklā goyā

girya-e-chashm huā girya-e-marjāñ mujh tak

ḳhush-libāsī faqat andoh-e-basārat kā fareb

chal ke aatā hai har ik sāya-e-uryāñ mujh tak

ik diyā roz jalātā hai koī āḳhir-e-shab

ik kiran roz pahuñchtī hai pareshāñ mujh tak

waqia dasht-nawardi hua aasan mujh tak

bin-bulae chala aata hai bayaban mujh tak

kunj-e-aghosh-e-junun tangi-e-furqat se farar

ek suhulat se khinche daman-e-paiman mujh tak

rauzan-e-hijr sukut-e-shab-e-wahshat mein khula

jalwa-e-nur hua nala-e-mizhgan mujh tak

thi jise shohrat-e-asbab-e-kushada ki talash

aa ke mashhur hua be-sar-o-saman mujh tak

rang-e-aina rag-e-sang se nikla goya

girya-e-chashm hua girya-e-marjaan mujh tak

KHush-libasi faqat andoh-e-basarat ka fareb

chal ke aata hai har ek saya-e-uryan mujh tak

ek diya roz jalata hai koi aaKHir-e-shab

ek kiran roz pahunchti hai pareshan mujh tak