waqif-e-haal nasim-e-sahari hai ki nahin

vāqif-e-hāl nasīm-e-saharī hai ki nahīñ

god phūloñ se gulsitāñ kī bharī hai ki nahīñ

ba.ad meñ sochnā kis dar se hue the dāḳhil

pahle dekho ye vahī bāra-darī hai ki nahīñ

qāfila luT bhī chukā rāh-numā soch meñ hai

mujh pe ilzām ġhalat rāhbarī hai ki nahīñ

merā dil toḌne vaalo ye batāo duniyā

aaj bhī kār--gah-e-shīsha-garī hai ki nahīñ

sirf ye dekhne aate haiñ havā ke jhoñke

shāḳh har zaḳhm-e-tamannā kī harī hai ki nahīñ

vo charāġh-e-shab-e-āḳhir huuñ ki ab sochtā huuñ

mere dāman meñ koī ḳhush-ḳhabarī hai ki nahīñ

'nashtar' āzād haiñ āzādī kā ye daur magar

daur-e-āzādī-e-be-bāl-o-parī hai ki nahīñ

waqif-e-haal nasim-e-sahari hai ki nahin

god phulon se gulsitan ki bhari hai ki nahin

baad mein sochna kis dar se hue the daKHil

pahle dekho ye wahi bara-dari hai ki nahin

qafila luT bhi chuka rah-numa soch mein hai

mujh pe ilzam ghalat rahbari hai ki nahin

mera dil toDne walo ye batao duniya

aaj bhi kar--gah-e-shisha-gari hai ki nahin

sirf ye dekhne aate hain hawa ke jhonke

shaKH har zaKHm-e-tamanna ki hari hai ki nahin

wo charagh-e-shab-e-aKHir hun ki ab sochta hun

mere daman mein koi KHush-KHabari hai ki nahin

'nashtar' aazad hain aazadi ka ye daur magar

daur-e-azadi-e-be-baal-o-pari hai ki nahin