waqif KHud apni chashm-e-gurezan se kaun hai

vāqif ḳhud apnī chashm-e-gurezāñ se kaun hai

mānūs ab mire dil-e-vīrāñ se kaun hai

kis ko ḳhabar hai kis ghaḌī āñkheñ chhalak paḌeñ

ab āshnā tahayya-e-tūfāñ se kaun hai

dekheñ jise ḳhalal hai usī ke dimāġh meñ

sarshār ab tasavvur-e-jānāñ se kaun hai

vo zulm shahr meñ hai ki andher hai koī

vābasta rasm-e-jashn-e-charāġhāñ se kaun hai

dekho jise vahī hai giraftār-e-ārzū

ab duur is navāh meñ zindāñ se kaun hai

maqtal meñ jis ko apne lahū se jalāyā thā

pur-nūr us ek sham-e-farozāñ se kaun hai

chehroñ kī zardiyoñ se 'zafar' ho muvāzana

nazdīk rañg-e-dasht-o-bayābāñ se kaun hai

waqif KHud apni chashm-e-gurezan se kaun hai

manus ab mere dil-e-viran se kaun hai

kis ko KHabar hai kis ghaDi aankhen chhalak paDen

ab aashna tahayya-e-tufan se kaun hai

dekhen jise KHalal hai usi ke dimagh mein

sarshaar ab tasawwur-e-jaanan se kaun hai

wo zulm shahr mein hai ki andher hai koi

wabasta rasm-e-jashn-e-charaghan se kaun hai

dekho jise wahi hai giraftar-e-arzu

ab dur is nawah mein zindan se kaun hai

maqtal mein jis ko apne lahu se jalaya tha

pur-nur us ek sham-e-farozan se kaun hai

chehron ki zardiyon se 'zafar' ho muwazana

nazdik rang-e-dasht-o-bayaban se kaun hai