war har ek mere zaKHm ka hamil aaya

vaar har ek mire zaḳhm kā hāmil aayā

apnī talvār ke maiñ ḳhud hī muqābil aayā

bādbānoñ ne har ik samt badal kar dekhī

koī manzar na nazar sūrat sāhil aayā

gard hone ne hī mahmez kiyā merā safar

merā rasta mirī dīvār meñ haa.il aayā

is fusūñ kī koī tauzīh nahīñ ho paatī

is ke hāthoñ maiñ bhalā kaise mirā dil aayā

dard se joḌ liyā saaz ne rishta apnā

aur phir soz pahan kar tirī paa.el aayā

ek taḳhrīb tavātur se rahī dil meñ mire

ik tasalsul sā mire haal meñ shāmil aayā

jis kā anjām huā us kī shurūāt na thī

raah par aa na sakā jo sar-e-manzil aayā

zinda rahne ke taqāzoñ ne mujhe maar diyā

sar pe 'jāved' ajab ahd-e-masā.il aayā

war har ek mere zaKHm ka hamil aaya

apni talwar ke main KHud hi muqabil aaya

baadbanon ne har ek samt badal kar dekhi

koi manzar na nazar surat sahil aaya

gard hone ne hi mahmez kiya mera safar

mera rasta meri diwar mein hail aaya

is fusun ki koi tauzih nahin ho pati

is ke hathon main bhala kaise mera dil aaya

dard se joD liya saz ne rishta apna

aur phir soz pahan kar teri pael aaya

ek taKHrib tawatur se rahi dil mein mere

ek tasalsul sa mere haal mein shamil aaya

jis ka anjam hua us ki shuruat na thi

rah par aa na saka jo sar-e-manzil aaya

zinda rahne ke taqazon ne mujhe mar diya

sar pe 'jawed' ajab ahd-e-masail aaya