وار سے ہم دل بیدار تک آ پہنچے ہیں

وار سے ہم دل بیدار تک آ پہنچے ہیں

زندگی کے نئے معیار تک آ پہنچے ہیں

خوش بیاں تلخیٔ گفتار تک آ پہنچے ہیں

سینۂ گل سے لب خار تک آ پہنچے ہیں

ہر قدم جلتے ہیں جب خود ہی چراغ منزل

لوگ اس گرمئ رفتار تک آ پہنچے ہیں

اہل دل آج ہوئے عظمت دل کے قائل

بے جھجک انجمن یار تک آ پہنچے ہیں

کیوں سبک سر ہوئے جاتے ہیں نظر میں اپنی

کس کے احسان گراں بار تک آ پہنچے ہیں

سوز دل بجلیاں بن جاتا ہے جس میں ڈھل کر

ساز انفاس کے اس تار تک آ پہنچے ہیں

غم جاناں غم دوراں سے بدل جائے جہاں

ہم اس آئینۂ کردار تک آ پہنچے ہیں

خیر مقدم کے فریبوں کو سمجھنے کے لئے

آج اک بزم ریاکار تک آ پہنچے ہیں

خود جہاں دار و رسن کرتے ہیں تعظیم حیات

ہم اسی رفعت ایثار تک آ پہنچے ہیں

کیوں نہ بھڑکاؤں شفاؔ عزم کے شعلے بڑھ کر

مرحلے اب مرے اشعار تک آ پہنچے ہیں