war se hum dil-e-bedar tak aa pahunche hain

vaar se ham dil-e-bedār tak aa pahuñche haiñ

zindagī ke na.e me.aar tak aa pahuñche haiñ

ḳhush-bayāñ talḳhī-e-guftār tak aa pahuñche haiñ

sīna-e-gul se lab-e-ḳhār tak aa pahuñche haiñ

har qadam jalte haiñ jab ḳhud hī charāġh-e-manzil

log is garmī-e-raftār tak aa pahuñche haiñ

ahl-e-dil aaj hue azmat-e-dil ke qaa.il

be-jhijak anjuman-e-yār tak aa pahuñche haiñ

kyoñ subuk-sar hue jaate haiñ nazar meñ apnī

kis ke ehsān-e-girāñ-bār tak aa pahuñche haiñ

soz-e-dil bijliyāñ ban jaatā hai jis meñ Dhal kar

sāz-e-anfās ke us taar tak aa pahuñche haiñ

ġham-e-jānāñ ġham-e-daurāñ se badal jaa.e jahāñ

ham us ā.īna-e-kirdār tak aa pahuñche haiñ

ḳhair-maqdam ke fareboñ ko samajhne ke liye

aaj ik bazm-e-riyā-kār tak aa pahuñche haiñ

ḳhud jahāñ dār-o-rasan karte haiñ tāzīm-e-hayāt

ham usī rif.at-e-īsār tak aa pahuñche haiñ

kyoñ na bhaḌkā.ūñ 'shifā' azm ke sho.ale baḌh kar

marhale ab mire ash.ār tak aa pahuñche haiñ

war se hum dil-e-bedar tak aa pahunche hain

zindagi ke nae mear tak aa pahunche hain

KHush-bayan talKHi-e-guftar tak aa pahunche hain

sina-e-gul se lab-e-KHar tak aa pahunche hain

har qadam jalte hain jab KHud hi charagh-e-manzil

log is garmi-e-raftar tak aa pahunche hain

ahl-e-dil aaj hue azmat-e-dil ke qail

be-jhijak anjuman-e-yar tak aa pahunche hain

kyon subuk-sar hue jate hain nazar mein apni

kis ke ehsan-e-giran-bar tak aa pahunche hain

soz-e-dil bijliyan ban jata hai jis mein Dhal kar

saz-e-anfas ke us tar tak aa pahunche hain

gham-e-jaanan gham-e-dauran se badal jae jahan

hum us aaina-e-kirdar tak aa pahunche hain

KHair-maqdam ke farebon ko samajhne ke liye

aaj ek bazm-e-riya-kar tak aa pahunche hain

KHud jahan dar-o-rasan karte hain tazim-e-hayat

hum usi rifat-e-isar tak aa pahunche hain

kyon na bhaDkaun 'shifa' azm ke shoale baDh kar

marhale ab mere ashaar tak aa pahunche hain