waraftagi-e-ishq na jae to kya karen

vāraftagī-e-ishq na jaa.e to kyā kareñ

terā bhī ab ḳhayāl na aa.e to kyā kareñ

ḳhud sharm-e-ishq dil ko miTā.e to kyā kareñ

un tak nigāh-e-shauq na jaa.e to kyā kareñ

mai-ḳhvāriyāñ gunāh sahī sāqī-e-azal

jab abr jhuum jhuum ke aa.e to kyā kareñ

ye dair vo haram ye kalīsā vo mai-kada

apnī taraf har ek bulā.e to kyā kareñ

mumkin hai har ḳhayāl kā dil se nikālnā

terā ḳhayāl aa ke na jaa.e to kyā kareñ

maanā nigāh-e-shauq rahe ehtiyāt se

har jalva ḳhud nazar meñ samā.e to kyā kareñ

'bāsit' sitam pe shukr-e-sitam chāhiye magar

koī karam se ham ko miTā.e to kyā kareñ

waraftagi-e-ishq na jae to kya karen

tera bhi ab KHayal na aae to kya karen

KHud sharm-e-ishq dil ko miTae to kya karen

un tak nigah-e-shauq na jae to kya karen

mai-KHwariyan gunah sahi saqi-e-azal

jab abr jhum jhum ke aae to kya karen

ye dair wo haram ye kalisa wo mai-kada

apni taraf har ek bulae to kya karen

mumkin hai har KHayal ka dil se nikalna

tera KHayal aa ke na jae to kya karen

mana nigah-e-shauq rahe ehtiyat se

har jalwa KHud nazar mein samae to kya karen

'basit' sitam pe shukr-e-sitam chahiye magar

koi karam se hum ko miTae to kya karen