waraftagi-e-shauq-e-junun darmiyan thi

vāraftagī-e-shauq-e-junūñ darmiyān thī

varna ye dāstāñ bhī koī dāstān thī

ghar se milā huā thā koī ghar to kyā huā

dīvār ik anā kī vo jo darmiyān thī

vo fikr thī ki dhyān thā yā ik ḳhayāl thā

dil ke taḳhayyulāt kī ūñchī uḌaan thī

par bāñdh ke mire mujhe majbūr kar diyā

jab ye zamīn merī mirā āsmān thī

paane kī aarzū kabhī khone kā ranj-o-ġham

ye zindagī nahīñ thī koī imtihān thī

'kāzim' zamīñ ko oḌh ke chup-chāp so ga.e

ik 'umr kī hamāre badan par thakān thī

waraftagi-e-shauq-e-junun darmiyan thi

warna ye dastan bhi koi dastan thi

ghar se mila hua tha koi ghar to kya hua

diwar ek ana ki wo jo darmiyan thi

wo fikr thi ki dhyan tha ya ek KHayal tha

dil ke taKHayyulat ki unchi uDan thi

par bandh ke mere mujhe majbur kar diya

jab ye zamin meri mera aasman thi

pane ki aarzu kabhi khone ka ranj-o-gham

ye zindagi nahin thi koi imtihan thi

'kazim' zamin ko oDh ke chup-chap so gae

ek 'umr ki hamare badan par thakan thi