وارثوں میں ہو چکا جب فیصلہ (ردیف .. ا)

وارثوں میں ہو چکا جب فیصلہ

مرنے والے کا جنازہ تب اٹھا

ہے کوئی اس سے بھی بڑھ کر سانحہ

قتل میرا میرے ہی گھر میں ہوا

چند پیسوں کا ہمیں لالچ نہ دو

تاج ہم لوگوں کی ٹھوکر میں رہا

سورماؤں میں گنا جاتا ہے وہ

جنگ کے میداں میں جو پیچھے رہا

اس کے در پر بھی تہی کاسہ رہے

جو سخاوت کا علم بردار تھا

ہم خیال اپنا یہاں کوئی نہیں

ہاں اگر تو ہے تو ہاتھ اوپر اٹھا

تھا تمہیں کوثرؔ بہت ہجرت کا شوق

یہ بھی سوچا کس قدر گھاٹا ہوا