wasta hai na dawa hai na dua mange hai

vāsta hai na davā hai na duā māñge hai

terā bīmār to āñchal kī havā māñge hai

ġhuncha ġhuncha chaman-e-dahr kā allāh allāh

tere andāz-e-tabassum kī adā māñge hai

chāñd kartā hai falak se tirā dīdār agar

chāñdnī baḌh ke tujhī se to ziyā māñge hai

bijliyāñ sī tire aariz se damak uThtī haiñ

rang kājal bharī āñkhoñ se ghaTā māñge hai

dil-o-jāñ nazr karūñ tujh pe luTā duuñ duniyā

mujh se kyā chiiz in āñkhoñ kī hayā māñge hai

tere sāñsoñ kī mahaktī mile ai kaash fazā

zinda rahne ko ye dil āb-o-havā māñge hai

māñgne vaale hazāroñ haiñ jahāñ meñ yuuñ to

terā dīvāna magar sab se judā māñge hai

kyoñ ye kuchh log mohabbat ko burā kahte haiñ

maiñ to kahtā huuñ mohabbat ko ḳhudā māñge hai

dosh par zulf-e-mo.ambar ko bikhar jaane do

is kī ḳhushbū ko ba-sad-shauq sabā māñge hai

us ke kūche meñ chaleñ ḳhuun bahā deñ 'muḳhtār'

aaj dīvānoñ se vo ḳhūn-e-vafā māñge he

wasta hai na dawa hai na dua mange hai

tera bimar to aanchal ki hawa mange hai

ghuncha ghuncha chaman-e-dahr ka allah allah

tere andaz-e-tabassum ki ada mange hai

chand karta hai falak se tera didar agar

chandni baDh ke tujhi se to ziya mange hai

bijliyan si tere aariz se damak uThti hain

rang kajal bhari aankhon se ghaTa mange hai

dil-o-jaan nazr karun tujh pe luTa dun duniya

mujh se kya chiz in aankhon ki haya mange hai

tere sanson ki mahakti mile ai kash faza

zinda rahne ko ye dil aab-o-hawa mange hai

mangne wale hazaron hain jahan mein yun to

tera diwana magar sab se juda mange hai

kyon ye kuchh log mohabbat ko bura kahte hain

main to kahta hun mohabbat ko KHuda mange hai

dosh par zulf-e-moambar ko bikhar jaane do

is ki KHushbu ko ba-sad-shauq saba mange hai

us ke kuche mein chalen KHun baha den 'muKHtar'

aaj diwanon se wo KHun-e-wafa mange he