wasta humse to pahle hi wo kam rakhte hain

vāsta ham se to pahle hī vo kam rakhte haiñ

vo hamīñ haiñ jo mohabbat kā bharam rakhte haiñ

khol deñ bhed hamāre na kisī din āñkheñ

is liye jaan ke ham āñkhoñ ko nam rakhte haiñ

maiñ adā-band nahīñ par ye sunā hai maiñ ne

vo adā ḳhaas hai jo mere sanam rakhte haiñ

bāñTte rahte haiñ muskāneñ ham apnī sab meñ

aur chhupā kar dil-e-hamdard meñ ġham rakhte haiñ

dekh lete haiñ bulā kar unheñ chāheñ jis dam

kam se kam itnā to ham āñkhoñ meñ dam rakhte haiñ

ho na jaa.e kahīñ nārāz mirā va.ada-shikan

'fauziya' is ke liye sar ko bhī ḳham rakhte haiñ

wasta hum se to pahle hi wo kam rakhte hain

wo hamin hain jo mohabbat ka bharam rakhte hain

khol den bhed hamare na kisi din aankhen

is liye jaan ke hum aankhon ko nam rakhte hain

main ada-band nahin par ye suna hai main ne

wo ada KHas hai jo mere sanam rakhte hain

banTte rahte hain muskanen hum apni sab mein

aur chhupa kar dil-e-hamdard mein gham rakhte hain

dekh lete hain bula kar unhen chahen jis dam

kam se kam itna to hum aankhon mein dam rakhte hain

ho na jae kahin naraaz mera wada-shikan

'fauziya' is ke liye sar ko bhi KHam rakhte hain