waz mein jab nahin asar waiz

va.az meñ jab nahīñ asar vaa.iz

kyoñ phirātā hai apnā sar vaa.iz

tark-e-ulfat kī khā.ūñgā maiñ qasam

is ghaḌī dhyān hai kidhar vaa.iz

manā rone se kyā karegā mujhe

ab to hai ḳhud hī chashm-tar vaa.iz

phir tarīq-e-vafā se bahkānā

koī dam aur kar safar vaa.iz

chashm-e-jallād ham ne dekhī hai

is nazar se na dekh idhar vaa.iz

jāntā thā ye kuchh sunegā nahīñ

hañs paḌā mujh ko dekh kar vaa.iz

fasl-e-gul dekhte hī sūjhī aur

aa gayā apne rang par vaa.iz

yaad kis kis tarah ke jumle haiñ

apne fan meñ hai ḳhuub har vaa.iz

waz mein jab nahin asar waiz

kyon phiraata hai apna sar waiz

tark-e-ulfat ki khaunga main qasam

is ghaDi dhyan hai kidhar waiz

mana rone se kya karega mujhe

ab to hai KHud hi chashm-tar waiz

phir tariq-e-wafa se bahkana

koi dam aur kar safar waiz

chashm-e-jallad hum ne dekhi hai

is nazar se na dekh idhar waiz

jaanta tha ye kuchh sunega nahin

hans paDa mujh ko dekh kar waiz

fasl-e-gul dekhte hi sujhi aur

aa gaya apne rang par waiz

yaad kis kis tarah ke jumle hain

apne fan mein hai KHub har waiz