wazeh nahin jazbaat jo masum hamare

vāzeh nahīñ jazbāt jo mā'sūm hamāre

alfāz kitāboñ ke haiñ mafhūm hamāre

is fikr meñ ik roz uThā.egā unheñ rab

bechain haiñ qabroñ meñ bhī marhūm hamāre

vo zulm ke hamrāh haiñ ham sabr ke sāthī

zālim haiñ agar un ke to mazlūm hamāre

ham ḳhud hī ḳharīdār dukāneñ bhī hamārī

milte nahīñ lekin kahīñ showrōm hamāre

kuchh svarg ke vaasī haiñ to kuchh ḳhuld ke haqdār

jaate haiñ kidhar dekhiye marhūm hamāre

mī'ād mu’ayyan hai har ik kaam kī lekin

kuchh log nahīñ hote haiñ manzūm hamāre

mehnat hai kisī aur kī hai mauj kisī kī

is sach se abhī log haiñ mahrūm hamāre

vo pahle zarā fikr kī gahrā.ī meñ utreñ

ash'ār jinheñ lagte haiñ mauhūm hamāre

is 'ālam-e-suġhrā meñ bahut jaan hai 'rāhib'

haiñ ‘ālam-e-lāhūt meñ mā'dūm hamāre

wazeh nahin jazbaat jo ma'sum hamare

alfaz kitabon ke hain mafhum hamare

is fikr mein ek roz uThaega unhen rab

bechain hain qabron mein bhi marhum hamare

wo zulm ke hamrah hain hum sabr ke sathi

zalim hain agar un ke to mazlum hamare

hum KHud hi KHaridar dukanen bhi hamari

milte nahin lekin kahin showroom hamare

kuchh swarg ke wasi hain to kuchh KHuld ke haqdar

jate hain kidhar dekhiye marhum hamare

mi'ad mu’ayyan hai har ek kaam ki lekin

kuchh log nahin hote hain manzum hamare

mehnat hai kisi aur ki hai mauj kisi ki

is sach se abhi log hain mahrum hamare

wo pahle zara fikr ki gahrai mein utren

ash'ar jinhen lagte hain mauhum hamare

is 'alam-e-sughra mein bahut jaan hai 'rahib'

hain ‘alam-e-lahut mein ma'dum hamare