wafa chahta tha jafa chahta hun

vafā chāhtā thā jafā chāhtā huuñ

maiñ kyā chāhtā thā maiñ kyā chāhtā huuñ

vafūr-e-alam se hai ye haal merā

abhī ashk ban kar bahā chāhtā huuñ

nahīñ mujh ko ma.alūm ḳhud apnī ḳhvāhish

tumheñ kyā batā.ūñ maiñ kyā chāhtā huuñ

mujhe jā-ba-jā apne jalve dikhāo

tumheñ har jagah dekhnā chāhtā huuñ

koī merī is sāda-lauhī ko dekhe

ġham-e-ishq kī maiñ davā chāhtā huuñ

mile haiñ zamāne ke sab aish mujh ko

ḳhudā jaane maiñ aur kyā chāhtā huuñ

baḌhā jā rahā huuñ kahāñ se kahāñ tak

ḳhudā-e-do-ālam huā chāhtā huuñ

bahar-hāl maiñ shukr kartā huuñ terā

bahar-hāl terī razā chāhtā huuñ

tumhīñ se thā jab merā har ḳhvāb rangīñ

vahī ishq kī ibtidā chāhtā huuñ

ġham-e-ishq hī hai mirī shart-e-hastī

ġham-e-ishq had se sivā chāhtā huuñ

na hai dard-e-dil kī davā koī 'shaidā'

na maiñ dard-e-dil kī davā chāhtā huuñ

wafa chahta tha jafa chahta hun

main kya chahta tha main kya chahta hun

wafur-e-alam se hai ye haal mera

abhi ashk ban kar baha chahta hun

nahin mujh ko malum KHud apni KHwahish

tumhein kya bataun main kya chahta hun

mujhe ja-ba-ja apne jalwe dikhao

tumhein har jagah dekhna chahta hun

koi meri is sada-lauhi ko dekhe

gham-e-ishq ki main dawa chahta hun

mile hain zamane ke sab aish mujh ko

KHuda jaane main aur kya chahta hun

baDha ja raha hun kahan se kahan tak

KHuda-e-do-alam hua chahta hun

bahar-haal main shukr karta hun tera

bahar-haal teri raza chahta hun

tumhin se tha jab mera har KHwab rangin

wahi ishq ki ibtida chahta hun

gham-e-ishq hi hai meri shart-e-hasti

gham-e-ishq had se siwa chahta hun

na hai dard-e-dil ki dawa koi 'shaida'

na main dard-e-dil ki dawa chahta hun