wafa-e-dostan kaisi jafa-e-dushmanan kaisi

vafā-e-dostāñ kaisī jafā-e-dushmanāñ kaisī

na pūchhā ho kisī ne jis ko us kī dāstāñ kaisī

kuchh aisā ehtirām-e-dard-e-ulfat hai mire dil ko

ḳhamoshī hukmarāñ hai aah o fariyād o fuġhāñ kaisī

kisī ko fikr-e-āzādī nahīñ is qaid-e-rañgīñ se

dil-e-ālam pe hai chhā.ī huī mohr-e-butāñ kaisī

bhulā hī dete haiñ us ko jo guzrā bazm-e-ālam se

hai sab ko apnī apnī fikr yād-e-raftagāñ kaisī

tumhārā mudda.ā hī jab samajh meñ kuchh nahīñ aayā

to phir mujh par nazar Daalī ye tum ne mehrbāñ kaisī

abhī hote agar duniyā meñ 'dāġh'-e-dehlavī zinda

to vo sab ko batā dete hai 'vahshat' kī zabāñ kaisī

wafa-e-dostan kaisi jafa-e-dushmanan kaisi

na puchha ho kisi ne jis ko us ki dastan kaisi

kuchh aisa ehtiram-e-dard-e-ulfat hai mere dil ko

KHamoshi hukmaran hai aah o fariyaad o fughan kaisi

kisi ko fikr-e-azadi nahin is qaid-e-rangin se

dil-e-alam pe hai chhai hui mohr-e-butan kaisi

bhula hi dete hain us ko jo guzra bazm-e-alam se

hai sab ko apni apni fikr yaad-e-raftagan kaisi

tumhaara muddaa hi jab samajh mein kuchh nahin aaya

to phir mujh par nazar Dali ye tum ne mehrban kaisi

abhi hote agar duniya mein 'dagh'-e-dehlawi zinda

to wo sab ko bata dete hai 'wahshat' ki zaban kaisi