wafa ka imtihan hai jaan-o-tan ki aazmaish hai

vafā kā imtihāñ hai jān-o-tan kī āzmā.ish hai

ḳhudā rakkhe ḳhudī ke bāñkpan kī āzmā.ish hai

ba-tarz-e-nau sajā.ī jā rahī hai bazm-e-parvezī

ba-andāz-e-digar phir kohkan kī āzmā.ish hai

lab-e-jū sāqiyā yuuñ hī musalsal daur-e-paimāna

ki zor-e-gardish-e-charḳh-e-kuhan kī āzmā.ish hai

ḳhizāñ kā zikr kyā vo daur thā nā-sāz-gārī kā

bahār aa.ī hai ab ahl-e-chaman kī āzmā.ish hai

mirī dīvāngī kā imtihāñ ik baat hai varna

haqīqat meñ tire dār-o-rasan kī āzmā.ish hai

tavāf-e-kirmak-e-nādāñ kā chakkar ḳhatm hai 'āsif'

bas ab zarf-e-charāġh-e-anjuman kī āzmā.ish hai

wafa ka imtihan hai jaan-o-tan ki aazmaish hai

KHuda rakkhe KHudi ke bankpan ki aazmaish hai

ba-tarz-e-nau sajai ja rahi hai bazm-e-parwezi

ba-andaz-e-digar phir kohkan ki aazmaish hai

lab-e-ju saqiya yun hi musalsal daur-e-paimana

ki zor-e-gardish-e-charKH-e-kuhan ki aazmaish hai

KHizan ka zikr kya wo daur tha na-saz-gari ka

bahaar aai hai ab ahl-e-chaman ki aazmaish hai

meri diwangi ka imtihan ek baat hai warna

haqiqat mein tere dar-o-rasan ki aazmaish hai

tawaf-e-kirmak-e-nadan ka chakkar KHatm hai 'asif'

bas ab zarf-e-charagh-e-anjuman ki aazmaish hai