wafa ka tana-bana DhunDhta hai

vafā kā tānā-bānā DhūñDhtā hai

na jaane kyā divāna DhūñDhtā hai

havas us kī falak se bhī hai ūñchī

vo tāroñ kā ḳhazāna DhūñDhtā hai

ghanī chhāñv pakaḌ letī hai paañv

musāfir dil Thikānā DhūñDhtā hai

kisī ke sāmne vo sar jhuke kyā

jo terā āstāna DhūñDhtā hai

uḌe panchhī ḳhalā meñ jitnā ūñchā

zamīñ par āb-o-dāna DhūñDhtā hai

ḳhirad se hogī dil kī pāsbānī

ki tīr-e-dil nishāna DhūñDhtā hai

vo de de kar mujhe zehnī aziyyat

badan par tāziyāna DhūñDhtā hai

vo apnī zaat meñ mudġham hai 'saifī'

use saarā zamāna DhūñDhtā hai

wafa ka tana-bana DhunDhta hai

na jaane kya diwana DhunDhta hai

hawas us ki falak se bhi hai unchi

wo taron ka KHazana DhunDhta hai

ghani chhanw pakaD leti hai panw

musafir dil Thikana DhunDhta hai

kisi ke samne wo sar jhuke kya

jo tera aastana DhunDhta hai

uDe panchhi KHala mein jitna uncha

zamin par aab-o-dana DhunDhta hai

KHirad se hogi dil ki pasbani

ki tir-e-dil nishana DhunDhta hai

wo de de kar mujhe zehni aziyyat

badan par taziyana DhunDhta hai

wo apni zat mein mudgham hai 'saifi'

use sara zamana DhunDhta hai