wafa kar raha hun jafa chahta hun

vafā kar rahā huuñ jafā chāhtā huuñ

ḳhatā kar rahā huuñ sazā chāhtā huuñ

mohabbat kā ye bhī koī marhala hai

ki maiñ nāla-e-nā-rasā chāhtā huuñ

nigāhoñ kī iffat diloñ kī tahārat

maiñ sar se qadam tak hayā chāhtā huuñ

taraddud tavahhum kī zulmat miTā kar

maiñ ilm-o-yaqīñ kī ziyā chāhtā huuñ

maiñ aḳhlāq-o-kirdār-o-rūhāniyat meñ

tanazzul nahīñ irtiqā chāhtā huuñ

ḳhudā kī sharī.at ho nāfiz zamīñ par

maiñ insāniyat kī baqā chāhtā huuñ

hai jannat to terī razā kī alāmat

ilāhī maiñ terī razā chāhtā huuñ

'urūj' un kā paiġhām pahuñchā to mujh tak

magar maiñ kuchh is se sivā chāhtā huuñ

wafa kar raha hun jafa chahta hun

KHata kar raha hun saza chahta hun

mohabbat ka ye bhi koi marhala hai

ki main nala-e-na-rasa chahta hun

nigahon ki iffat dilon ki tahaarat

main sar se qadam tak haya chahta hun

taraddud tawahhum ki zulmat miTa kar

main ilm-o-yaqin ki ziya chahta hun

main aKHlaq-o-kirdar-o-ruhaniyat mein

tanazzul nahin irtiqa chahta hun

KHuda ki shariat ho nafiz zamin par

main insaniyat ki baqa chahta hun

hai jannat to teri raza ki alamat

ilahi main teri raza chahta hun

'uruj' un ka paigham pahuncha to mujh tak

magar main kuchh is se siwa chahta hun